भारतीय शास्त्रीय संगीतातील कोणत्या स्वरांचा, रागांचा आपल्या शरीर क्रीया आणि मनावर कसा परिणाम होतो यावर आधारित उपचार म्हणजेच संगीतोपचार... ही थेरपी विविध प्रकारच्या मनोकायिक व्याधींवर अतिशय उपयुक्त अशी सहाय्यक किंवा पूरक उपचारपद्धती आहे. आजच्या आधुनिक जीवनशैली मुळे काही आजार मोठ्या प्रमाणात दिसून येतात. (उदा. निद्रानाश , बीपी, डायबिटीस, हार्मोनल इम्बॅलन्स, इ.) तर काही आजार दुर्धर आणि असाध्य आहेत . (उदा. हृदयरोग, स्मृतिभ्रंश, पार्कीन्सन्स, अल्झायमर, इ.) गतिमान जीवनशैली, मानसिक ताणतणाव यातून या व्याधी निर्माण झाल्या आहेत. अशा प्रकारच्या आजारावर उपयुक्त सहाय्यक थेरपी म्हणून म्युझिक थेरपी लोकप्रिय होत आहे.
संपूर्ण विश्व हे स्पंदनांनी भरलेले आहे असे आजचे आधुनिक विज्ञान आपल्याला सांगते. Vibrations... तरंग.. त्यातून निर्माण होणारे नाद, प्रतिनाद यातून सर्व विश्व गतिमान होते. हे तरंग संपूर्ण विश्र्वामध्ये, ब्रम्हांडामध्ये निनादत असतात, एकमेकांवर परिणाम करीत असतात. आजचे मॉडर्न क्वांटम फिजिक्स हेही यावर शिक्कामोर्तब करते. प्राचीन भारतीयांनी संगीताचा आणि संगीतशास्त्राचा सखोल अभ्यास केला होता. संगीतातील राग आणि आलाप, त्यातील नाद, त्यांचा मानवी शरीराबरोबर, विविध इंद्रियांबरोबर, अवयवांबरोबर असलेला संबंध त्यांनी अभ्यासला होता. शास्त्रीय संगीताबद्दल माहिती देणारे संगीत रत्नाकर, रागोपनिषद सारखे ग्रंथ यावर विस्तृत विवेचन करतात. संगीतोपचार ही एक सहाय्यकारी आणि पूरक थेरपी आहे.