पुस्तक/नियतकालिक, निर्मिती, छपाई आणि प्रकाशन प्रक्रिया समजून घ्या. स्वतःच स्वतःच्या पुस्तकांचे प्रकाशन करणे ही या कार्यशाळेची मध्यवर्ती संकल्पना आहे. आज तंत्रज्ञानाने फार मोठी प्रगती केली आहे. पूर्वी पुस्तक, ग्रंथ प्रकाशित करणे ही फार किचकट प्रक्रिया होती. लेखकाला प्रकाशक मिळणे हेच फार अवघड होते. स्क्रीप्ट प्रकाशकाला दिल्यावर त्याचे टायपिंग, डी.टी.पी. करणे, त्यानंतर त्याचे मुद्रीत शोधन करणे, संपादन करणे आणि त्यानंतर ते छपाईसाठी जायचे अशी प्रक्रिया होती. तसेच मुखपृष्ठ तयार करणे हेही काम करावे लागत असे. त्याचबरोबर प्रस्तावना, अभिप्राय, आय. एस. बी. एन. क्रमांक घेणे, वर्तमानपत्रांमध्ये परीक्षण पाठवणे हे करावे लागत असे. आज तंत्रज्ञान सोपे झाले आहे. डी. टी. पी.करणारे, मुद्रीतशोधक, संपादक, मुखपृष्ठ बनवणारे चित्रकार स्वतंत्रपणे उपलब्ध झाले आहेत. आय. एस. बी. एन. क्रमांक लेखकाला ऑनलाईन मिळवता येतो. लेखक स्वतः प्रस्तावना मिळवू शकतो. त्यामुळे पुस्तक निर्मिती प्रक्रियेतील वेळ खूप कमी झाला आहे. तसेच प्रिंट ऑन डिमांड तंत्रज्ञानामुळे आता कोणत्याही पुस्तकाच्या पंचवीस ते पन्नास प्रतीही छापता येतात. त्यामुळे पुस्तकामध्ये फार मोठी रक्कम गुंतवून ठेवावी लागत नाही. तसेच ऑनलाईन पुस्तक वितरणाच्या विविध सुविधा आणि अमेझॉन, फ्लिपकार्ट सारखी पोर्टल निर्माण झाल्याने वितरण करणे सोपे झाले आहे. तसेच ऑनलाईन बँकिंगमुळे पुस्तकाची रक्कम थेट खात्यात जमा होऊ शकते. सोशल मीडियाच्या माध्यमातून पुस्तकाची प्रसिद्धी करणेही सोपे झाले आहे. कार्यशाळेमध्ये स्वतःच स्वतःचे पुस्तक कसे प्रकाशित करावे याबाबत मार्गदर्शन केले जाणार आहे. नवोदित लेखकांना, संपादक तसेच पुस्तक/मासिक, नियतकालिक प्रकाशन व्यवसाय करू इच्छिणाऱ्या सर्वांसाठी अत्यंत उपयुक्त अशी कार्यशाळा आहे.